Fai un añu un xulgáu de Xixón dictaba sentencia sol desaloxu de la nave que tiempu atrás allugó les instalaciones de la fábrica FLEX nel barriu de La Calzada, y que’l 11 de Xunetu de 2008, tres 10 años d’abandonu, suciedá y goteres, un piñu de mozos y moces decidieron recuperar pal usu comunitariu y social de la xente. En dicha sentencia, la xueza encargada del casu ordenaba a los y les activistes escontra la especulación que desaloxaren l’edificiu y que-y lu reintegraren al so “llexítimu” dueñu, Construcciones Llorente SL, pa qu’ésti pudiere llevar a cau “l’usu y esfrute” de les sos instalaciones. Amás, por mor d’unes identificaciones arbitraries de la policía díes enantes del desaloxu, delles persones fueron acusaes d’un delitu "d'usurpación” y tán agora mesmo a la espera de xuiciu.
Pasó tou un añu enteru dende aquel desaloxu, de magar aquel 5 de Xunu de 2009, y les instalaciones de la FLEX, qu'endurante 11 meses abellugaron al Centru Social Okupáu y Autoxestionáu La ReFLEXón, tornen ser un sumideru de suciedá y abandonu, un edificiu abuxaracáu, apagáu y ensin vida. Les charres, los talleres, los conciertos, les proyeiciones cinematográfiques, les xintes populares, el mercáu de gratuidá, los recitales de poesía, l’autoxestión, la solidariedá y el trabayu en comuña dieron pasu de nueu al abandonu y la especulación, gracies al interés, o desinterés, ensegún se güeye, de Construcciones Llorente y de la mal llamada Xusticia.
Pero’l CSOA La ReFLEXón nun morrió aquel 5 de Xunu. El CSOA La ReFLEXón siguió y sigue vivu. Porque la especulación nun acabó aquel día, y porque la dicisión de llevar a cau un movimientu forizontal, asambleariu y anticapitalista nes instalaciones de la vieya fábrica de FLEX nun foi’l caprichu d’una xente. Aquella xente siguió guetando sitios afayaízos pa denunciar la especulación inmobiliaria y llevar alantre el so proyeutu anticapitalista, ocupó simbólicamente un edificiu na Cai Los Moros pa festexar l’aniversariu del proyeutu y desechó unos cuantos más por tar en condiciones ruinoses. Pero la gueta continúa, porque son innumerables los edificios qu’hai en Xixón abandonaos a la espera de tiempos meyores pa los intereses especulativos, y más que va haber de siguir estos tiempos de recurtes sociales, desemplegu y precariedá. El tiempu danos y siguirá dándonos la razón, y nós siguiremos denunciando la especulación inmobiliaria y lo inxusto d’esti sistema capitalista.
En Xixón, a 5 de Xunu de 2010. El conceyu nel esiliu del CSOA La ReFLEXón.
No hay comentarios:
Publicar un comentario